چین کے صدر شی چن پنگ نے صدر آصف علی زرداری کو لکھے خط میں صحت یابی کے لیے نیک تمناؤں کا اظہار کیا ہے۔صدر شی چن پنگ نے دونوں ملکوں کی دوستی اور مشترکہ مستقبل کے لیے تعاون میں اضافے کے عزم کا اعادہ کیا۔چین کےصدر نے 3 نومبر کو لکھے گئے خط میں صدر مملکت کے زخمی ہونے پر تشویش کا اظہار کرتے ہوئے ان کی جلد صحت یابی کی دعا کی تھی۔ صدر شی چن پنگ نے اپنے خط میں پاک چین دوستی کی گہرائی کا بھی اعادہ کیا۔ انہوں نے صدر آصف علی زرداری کو چین کا دورہ کرنے کی گرمجوشی سے دعوت بھی دی ۔۔چین کے صدر نے اپنے خط میں نئے دور میں مشترکہ مستقبل کے ساتھ چین پاکستان کمیونٹی کی تعمیر کے عزم پر زور دیا ۔ صدر آصف علی زرداری نے خط پر اظہار تشکر کیا۔ صدر مملکت نے کہا کہ اسٹریٹیجک شراکت داری کو وسعت دیں گے۔انہوں نے کہا کہ مستقبل قریب میں چین کا دورہ کروں گا جس سے دونوں ممالک کے دیرینہ اور مضبوط تعلقات کو مزید تقویت ملے گی۔