پاکستان۔اٹلی مشترکہ اقتصادی کمیشن' (JEC) کا 5واں اجلاس اطالوی وزارت خارجہ میں ہوا۔ اجلاس کی صدارت وفاقی وزیر برائے ماحولیاتی تبدیلی سینیٹر شیری رحمان اور اٹلی کی نائب وزیر برائے خارجہ امور اور بین الاقوامی تعاون  ماریہ تریپودی نے کی۔ اجلاس میں ’ماحولیاتی تبدیلی‘ سے نمٹنے اور ’واٹر مینجمنٹ‘ میں تعاون کے لیے ’مشترکہ فریم ورک‘ قائم کرنے پر اتفاق کیا گیا ۔ 'ڈپلومیٹک پاسپورٹ کے لیے ویزوں کے خاتمے کے معاہدے' کو حتمی شکل دینے کا خیرمقدم کرتے ہوئے، دونوں فریقوں نے 'مائیگریشن اینڈ لیبر موبلٹی' کے لیے فریم ورک کو حتمی شکل دینے کے لیے تیز رفتار مذاکرات کے عزم کا اعادہ کیا۔تقریب کا اختتام ایک اہم 'روڈ میپ فار کوآپریشن' پر دستخط کے ساتھ کیا گیا جس میں ماحولیاتی تبدیلی، تجارت اور سرمایہ کاری، ورثہ، ثقافت، زراعت، اعلیٰ تعلیم، تکنیکی تعاون اور حوالہ جات کے شعبوں میں ٹیکنالوجی کی منتقلی شامل ہیں۔ اس موقع پر وفاقی وزیر برائے ماحولیاتی تبدیلی سینیٹر شیری رحمان نے کہا کہ روم میں پاکستان۔اٹلی مشترکہ اقتصادی کمیشن کے 5ویں اجلاس کی نائب وزیر کے ساتھ صدارت کرتے ہوئے خوشی ہوئی۔ انہوں نےکہا کہ اسلام آباد میں اطالوی تجارتی ایجنسی کے دفتر کے قیام سے دوطرفہ تجارت کو فروغ ملے گا۔ شیری رحمان نےکہا کہ اگلے جے ای سی اجلاس کی میزبانی اسلام آباد میں باہمی طور پر مناسب وقت پر کی جائے گی جس کے ہم منتظر ہونگے۔ اجلاس میں پاکستان اور اٹلی کے تاجروں نے بھرپور شرکت کی۔