34ویں نیشنل گیمز تیزی سے اپنے اختتام کی جانب گامزن ہیں۔کھیلوں میں آرمی نے گولڈ میڈلز کی سنچری مکمل کرلی ہے ،پاک آرمی کے اتھلیٹس مجموعی تمغوں کی ڈبل سنچری کے قریب بھی پہنچ گئے ہیں۔
کوئٹہ میں جاری گیمز میں پاکستان آرمی 101 گولڈ میڈلز کے ساتھ سرفہرست ہے، آرمی کے ایتھلیٹس نے 65 سلور اور 29 برونز میڈلز بھی حاصل کر رکھے ہیں۔
دوسرے نمبر پر موجود واپڈا نے54 گولڈ، 50 سلور اور 43 برونز میڈل اپنے نام کئے ہیں۔نیوی کے دستے نے نیشنل گیمز میں اب تک 26 گولڈ میڈلز سمیت 89 تمغے حاصل کئے ہیں۔
پاکستان ائیر فورس نے 5 گولڈ، 19 سلور اور 26 برونز میڈلز جیتے ہیں ،ہائر ایجوکیشن کمیشن کے اب تک تین گولڈ میڈلز سمیت 62 میڈلز ہیں۔
خیبر پختونخوا نے سونے کے 2، چاندی کے3 اور 21 کانسی کے تمغے حاصل کئے ہیں۔ بلوچستان ، ریلویز اور پولیس نے ایک، ایک گولڈ میڈل جیتا ہے۔
پنجاب نے اب تک 6 سلور اور 23 برانز میڈلز جیتے ہیں جبکہ سندھ نے 3 سلور اور 12 برونز، اسلام آباد نے 4 برانز میڈلز اپنے نام کئے ہیں۔گلگت اور آزاد کشمیر کے کھلاڑی نیشنل گیمز میں اب تک کوئی میڈل نہیں جیت پائے۔