روسی فوج نے کہا ہے کہ اس نے یوکرین کے سب سے شدیدحملے کو پسپا کر دیا اور 24 گھنٹے تک جاری رہنے والی لڑائی میں 70 سے زیادہ حملہ آوروں کو مار دیا گیا ہے۔روس نے ان حملوں کا الزام یوکرین کے فوجی تخریب کاروں پر لگایا۔ لیکن یوکرین کا کہنا ہے کہ یہ حملہ روسی فوجیوں نے کیا جو اپنے ملک کے خلاف بغاوت کر رہے ہیں۔روس مخالف گروپ ۔فریڈم آف رشیا لیجن۔ نے حملوں کی ذمہ داری قبول کرتے ہوئے کہا ہے کہ بھاری توپ خانے سے روسی تنصیبات کو نشانہ بنایا گیا۔یہ لڑائی یوکرین کے شہر خارکیف کے شمال میں جنوب مغربی روس کے علاقے بیلگوروڈ میں ہوئی۔یہ خطہ روس کا ایک فوجی مرکز ہے، جہاں ایندھن اور گولہ بارود کے ڈپو ہیں۔روسی افواج نے حملہ آوروں کے زیر استعمال چار بکتر بند گاڑیاں اور پانچ پک اپ ٹرکوں کو تباہ کر دیا۔مقامی حکام نے الزام لگایا کہ حملہ آوروں نے ڈرون اور توپ خانے کا بھی استعمال کیا۔ تباہ ہونے والی بکتر بند گاڑیاں امریکی ساختہ ہیں اور امریکا نے کہا ہے کہ وہ اس حملے میں ملوث نہیں ہے۔