وزیر خارجہ بلاول بھٹو زرداری نے کہاہے کہ پاکستان مذاکرات کے ذریعے مسائل کے حل پر یقین رکھتا ہے۔تاشقند میں اقتصادی تعاون تنظیم کی وزرائے خارجہ کونسل کے 26ویں اجلاس سے خطاب کرتے ہوئے وزیرخارجہ نے کہاکہ ہمیں خطے کی بہتری کیلئے مل کر کام کرنے کی ضرورت ہے۔وزیر خارجہ بلاول بھٹو زرداری نے کہا کہ دنیا کوموسمیاتی تبدیلیوں کے اثرات کا سامنا ہے۔2022میں پاکستان کو تاریخ کے بدترین سیلاب کا سامناکرنا پڑا۔وزیرخارجہ نے کہاکہ حالیہ سیلاب سے پاکستان میں 3کروڑ سے زائد افراد متاثرہوئے۔لاکھوں گھر اور ہزاروں ایکڑپر کھڑی فصلیں متاثرہوئیں۔بلاول بھٹو زرداری نے کہاکہ گلوبل وارمنگ کی وجہ سے پاکستان میں گلیشیئرزتیزی سے پگھل رہے ہیں۔دنیا بھر میں کاربن کے استعمال میں پاکستان کاحصہ ایک فیصدسے بھی کم ہے۔وزیرخارجہ نے کہاکہ حالیہ سیلاب سےپاکستان کا 30ارب ڈالرکانقصان ہوا۔سیلاب متاثرین اورمعیشت کی بحالی اولین ترجیح ہے ۔ بلاول بھٹوزرداری نے کہاکہ اب اٹھائے جانے والے اقداما ت ہمارے مستقبل کو طے کریں گے۔دنیا کو معاشی،موسمیاتی تبدیلی اور اسلاموفوبیا جیسے مسائل درپیش ہیں۔وزیرخارجہ نے کہاکہ تمام ممالک کو موسمیاتی تبدیلیوں سے نمٹنےکیلئے ہنگامی بنیادوں پر کام کرنا ہوگا۔