کورونا وائرس کے پھیلاؤ کے حوالے سے خدشات کے باعث نوبل انعام کی تقریب 60 سال سے زیادہ عرصے کے بعد پہلی مرتبہ منسوخ کر دی گئی ہے۔برطانوی نشریاتی ادارے کے مطابق اس سال نوبل انعام جیتنے والوں کی فہرست جاری کی جائے گی لیکن 10 دسمبر کو ہونے والی تقریب منسوخ کر دی گئی ہے۔نوبل فاؤنڈیشن نے کہا ہے کہ کورونا کے اس دور میں ’انعام اور تقریب نئے طریقے سے منعقد ہوگی۔یہ خاص سال ہے جس میں سب کو قربانی دینے اور نئے حالات کے مطابق ڈھلنے کی ضرورت ہے۔ہم انعام یافتہ افراد کی خدمات کو سراہنے کے لیے نئے طریقے اپنائیں گے۔آخری مرتبہ یہ تقریب 1956 میں اس وقت منسوخ کی گئی تھی جب سرد جنگ کے دوران سوویت یونین نے ہنگری میں مداخلت کی تھی.