وزیرخارجہ شاہ محمود قریشی سے تحریک انصاف کے رہنما شوکت محمود بسرا نے اسلام آباد میں ملاقات کی اور موجودہ وبائی صورتحال سمیت باہمی دلچسپی کے امور پر تبادلہ خیال کیا۔وزیرخارجہ نے کہاکہ محدود معاشی وسائل کے باوجود، کورونا وبا کے پھیلاؤ کو روکنے اور اس عالمی چیلنج سے نمٹنے کیلئے حکومت تمام ممکنہ اقدامات اٹھا رہی ہے ۔پاکستان میں کورونا وائرس سے متاثرین کی تعداد میں اضافہ ہو رہا ہے ۔کوئی بھی ملک اس وقت تک اس بڑے چیلنج کا مقابلہ نہیں کر سکتا جب تک عوام، حکومت کی جانب سے دی جانے والی ہدایات پر عملدرآمد کو یقینی نہیں بناتے ۔ شاہ محمود قریشی نے کہا کہ ہمیں بحیثیت قوم متحد ہو کر اس وبا کے پھیلاؤ کو روکنا ہے۔
شوکت محمود بسرا نے کورونا وبا کے دوران اس مشکل گھڑی میں بیرون ملک مقیم پاکستانیوں کی خدمت کے حوالے سے سفارتخانوں کی بہترین کارکردگی پر وزیر خارجہ کو مبارکباد پیش کی ۔انہوں نے وطن واپسی کے منتظر بیرون ملک مقیم پاکستانیوں کی جلد واپسی کیلئے بھی کی جانے والی کاوشوں کوسراہا ۔